Fundación EROSKI destinará este ano 64.900 euros para financiar os tres proxectos que foron seleccionados na VIII Convocatoria de Financiamento de Intervencións en Cooperación Internacional. Nepal, Ecuador e Burkina-Faso son as zonas nas que se desenvolverán as intervencións apoiadas, lideradas polas asociacións Khoah, Manos Unidas e Mulleres de Burkina. Fundación EROSKI entregou un total de 835.616 euros para levar a cabo iniciativas solidarias en distintos países de África, Asia e América, nas oito edicións deste programa de cooperación internacional.

Constan Dacosta, Presidente de Fundación EROSKI, e a súa Directora Xeral, Arantxa Lascurain, asistiron á sinatura dos convenios que tivo lugar en Elorrio, sede de Fundación EROSKI, e que contou coa presenza dos representantes das entidades elixidas. En nome de Khoah acudiu a súa presidenta, Stephany Dano; de Manos Unidas asistiu Mercedes Viguri, Responsable de Cofinanciación e por parte de Mulleres de Burkina acudiron Montserrat Riba, Vicepresidenta e Secretaria e Amadeo Aixut, Tesoureiro.

Algodón ecolóxico con Khoah

A demanda deste algodón medra no mundo da moda, xa que se produce con abonos orgánicos e segue controis de pragas, botánicos e biolóxicos. En Nepal a súa produción é case inexistente e este proxecto, levado a cabo por Khoah e o seu socio local Mahagutti, trata de crear unha cadea de algodón ecolóxico e encontrar o subministro de materia prima axeitada, facilitar a formación e técnica necesaria para a produción e xestión da cadea. O obxectivo final desta iniciativa é paliar a drástica diminución de empregos xerada pola liberalización dos mercados internacionais e a competencia de países como China ou a India. Búscase reforzar a venta dos produtos téxtiles dos artesáns que traballan a través da ONG local. Ao redor de 1.500 mulleres produtoras e as súas familias, da casta dos intocables, se beneficiarán deste proxecto.

Formación e comercio xusto con Manos Unidas

O proxecto de Manos Unidas desenvólvese nos cantóns de Naranjal, Guayaquil e Balao (Ecuador), como potenciais zonas produtoras de cacao de fino aroma. Alí sitúanse diversas fincas produtoras de moitos anos cuxas plantacións non foron renovadas porque os recursos e coñecementos dos campesiños son escasos. Nelas implantarase o programa de formación e capacitación, de tres anos de duración, para potenciar promotores comunitarios e técnicos locais e conseguir a certificación orgánica e de comercio xusto das fincas adheridas ao programa. Preténdese mellorar o sistema organizativo, produtivo e comercial de 226 pequenos agricultores e agricultoras (153 homes e 73 mulleres) de cacao, fomentando o desenvolvemento humano con principios de equidade e xénero. A poboación beneficiaria de maneira indirecta achégase ás 1.130 persoas, dos núcleos familiares.

Almacenar cereais para Mulleres de Burkina

En Burkina Faso as choivas son periódicas e torrenciais, e aínda que as colleitas son boas, non todas poden ser almacenadas. O proxecto de Mulleres de Burkina consiste en construír unha nave para almacenar cereais e posteriormente comercializalos, de xeito que lle permitan á Asociación das viúvas e orfos Santo Agustino de Bissighin garantir a escolarización dos seus orfos. Perséguese obter 300 sacos de cereais durante as colleitas e revender parte deles aos máis desfavorecidos durante o período da seca; garantir a seguridade alimentaria; loitar contra os comerciantes que venden a prezos moi altos o cereal en período da seca e establecer rendas que permitan a concesión de préstamos e microproxectos das viúvas. A asociación asiste a 80 viúvas e 152 orfos.