Horrela, INGURUMENAREN NAZIOARTEKO EGUNEAN —ekainak 5— hasita, bezeroek poltsa hauek erosi ahal izango dituzte EROSKIko hipermerkatu guztietan, kontsumitzaileek plastikoaren erabilera murriztearen alde egindako eskaerari erantzunez. EROSKIk KONTSUMITZAILEEN FOKOAK deritzen partaidetza-tresnak ditu, eta horietaz baliatuta, kontsumitzaileek eztabaidatu, ondorioak atera eta EROSKIko merkataritza-jardueran txertatzeko moduko gomendioak zehazten dituzte era eraginkor batean.

Iaz, banaketa-kooperatibak proba pilotua abiarazi zuen, eta horretan oinarrituta ondorioztatu zen, hamabi hilabetetan, 86.967.600 plastiko-poltsaren erabilera ekidin litekeela hipermerkatu-sare osoan. Bizkaian, esaterako, 8.220.000 poltsa aurreztu ahal izango lirateke.

Honelaxe azaldu du EROSKIko Gizarte Erantzukizuneko Zuzendari Alejandro Martínez Berriotxoak: “EROSKIn bezeroek erabilera bakarreko poltsak erabiltzeari uztea lortu nahi dugu, eta horrexetarako planteatu diegu alternatiba hau. Kontsumitzaileek ekintzabide hau eskatu digute FOKOetan, eta laster batean, abian jarriko dugu hipermerkatu-sarean”.

EROSKIk ingurumen alorreko proiektuetarako erabiliko du erabili gabeko ohiko plastiko-poltsetatik aurrezten duen dirua. Ingurumen alorreko aditu-talde batek egingo du proiektuen aldez aurreko aukeraketa urterik urte. EROSKI eta WWW Espainako teknikariek osatuko dute talde hori, baina proiektu garailea Bazkide Kontsumitzaileek hautatuko dute. Toledoko baso bat berritzea izango da 2009an finantzatuko den lehenengo proiektua.

AURREKARIAK

EROSKIk 1991n abiarazi zuen poltsa berrerabilgarriak ezagutarazteko lehenengo kanpaina. Iaz arte, noizean behin antolatutako sentsibilizazio kanpainak ziren. Kontsumitzaileen eskaeraren haritik, ordea, banaketa-kooperatibak kanpaina hau enpresa-jarduerako konstante bihurtzea erabaki du, ohiko plastiko-poltsen erabilera murrizteko asmoz, poltsa berrerabilgarria bezalako alternatiben mesedetan.

Plastiko-poltsen fabrikazioan petrolioa, gas naturala eta industria petrokimikoko beste deribatu batzuk erabili ohi dira. Poltsa bakoitzak lau gramo CO2 inguru isurtzen ditu fabrikazioan, eta ondorioz, Espainian banatzen diren poltsa guztien artean, 441.000 tona isurtzen dira.

WWF Espainari buruz

WWW Espaina naturaren zaintzan diharduten munduko erakunde independenterik handi eta eraginkorrenetakoa da. Planetako ingurumenaren degradazioa geldiaraztea du helburu, gizakiak naturarekiko harmonian biziko den etorkizuna eraikitzeko bidean, aniztasun biologikoa zainduz, natur-baliabide berriztagarrien erabilera iraunkorra segurtatuz eta neurriz kanpoko kutsadura eta kontsumoaren murrizketa sustatuz. Proiektu honetarako, EROSKIk WWW Espaina izango du bazkide estrategikotzat merkataritza-sare osoan. Aldi berean, WWW Espaina arduratuko da ohiko plastiko-poltsetatik aurreztutako diruaz finantzatuko den lehen ingurumen-proiektua aurrera ateratzeaz.

IHOBEri buruz

IHOBE, Eusko Jaurlaritzako Ingurumen, Lurralde Antolaketa, Nekazaritza eta Arrantza Sailaren menpeko sozietate publikoa da, karbono-arrastoa (CO2 emisioak) neurtzea errazten duen ebaluazio tresna garatu duena. Eroskik erreferentziatzat hartuko du tresna hori etorkizunean bere merkataritza-erreferentziak ekodiseinatzeko, ingurumenarekin errespetuzkoagoak izan daitezen. EROSKIko plastiko-poltsen neurketa da tresna horrekin egingo den lehenengoa.